Жаңалықтарды Telegram арнамыздан оқыңыз!АҚШ президенті Дональд Трамп пен Украина президенті Владимир Зеленскийдің Ақ үйдегі кездесуі кезінде кикілжің туды. Тараптар журналистердің көзінше дауласып қалған. Сол үшін Украинаның табиғи ресурстарын пайдалану бойынша келісім жасалған жоқ. Бірлескен баспасөз мәслихаты да өтпеді. Украина президенті Ақ үйден шұғыл кетуге мәжбүр болған. Трамп болса, Зеленский бейбітшілікке дайын емес деп мәлімдеп, «Украина лидері үшінші дүниежүзілік соғыспен ойнап жатыр» деді. Ақ үйдің баспасөз хатшысы Кэролайн Левитт АҚШ әкімшілігі Украинаны қолдауға бөлінетін қаржылай көмекті тоқтатынын мәлімдеді. Тақырыпты халықаралық шолушы Арай Төлегенқызы жалғастырады.
Жұманың кешінде күллі әлем Ақ үйдегі қызу тартысқа куә болды. Кездесу барысында АҚШ президенті Дональд Трамп пен Украина президенті Владимир Зеленский сөзге келіп қалды. Жанжалдың басталуына АҚШ-тың вице-президенті Джей Ди Вэнстің Зеленскийді «құрмет көрсетпеді» деп сынға алуы түрткі болған.
Джей Ди Вэнс, АҚШ-тың вице-президенті:
Сіз бір рет те алғыс айттыңыз ба? Осы кездесуде рахмет айттыңыз ба? Қазанда Пенсильванияға барып, оппозиция үшін үгіт-насихат жүргіздіңіз. Америка Құрама Штаттарына және сіздің еліңізді қорғауға тырысып жатқан президентке ризашылық білдіріңіз.
Дау осы кезде қыза түсті. Трамп Вэнске жауап бермек болған Зеленскийдің сөзін бөлді.
Дональд Трамп, АҚШ президенті:
Еліңіздің жағдайы қиын. Жоқ, жоқ тым көп айттыңыз. Жеңіп жатқан жоқсыздар. Бірақ біздің арқамызда бұл қиындықтан шығуға мүмкіндік бар.
Владимир Зеленский, Украина президенті:
Біз еліміздеміз, мықты болып қала береміз. Соғыс басталғалы бері жалғыз қалдық. Мен бұл әкімшілікке алғысымды айттым.
Бұған Трамп «АҚШ әскери техника бермегенде, соғыс екі аптада бітер еді» деп жауап берді.
Дональд Трамп, АҚШ президенті:
Сіз жалғыз қалған жоқсыз. Біз сізге ақымақ президент арқылы 350 млрд доллар бердік. Әскери техника бердік.
CBS телеарнасының хабарлауынша, жұрт көзінше дауласудан кейін АҚШ әкімшілігінің өкілдері Зеленскийден Ақ үйден кетуін сұраған. «Рейтер» агенттігі қос президент қайта кездесуі мүмкін екенін жоққа шығармайды. АҚШ мемлекеттік хатшысы Марко Рубио болса, Украина президентін келіссөздерді өзі үшін сәтсіз еткені үшін кешірім сұрауға шақырды. Зеленский одан кейін америкалық Fox News телеарнасына берген сұхбатында кешірім сұрайтындай жамандық жасамағанын айтты.
Владимир Зеленский, Украина президенті:
АҚШ президенті мен халқын құрметтеймін. Біз ашық және әділ болуымыз керек деп ойлаймын.
Трамп пен Зеленскийдің сәтсіз кездесуінен кейін Еуропа лидерлері Украинаға қолдау білдірді. Әлеуметтік желіде олар «Украина, біз сенімен біргеміз» деп жазып жатыр. Ал АҚШ-тан кейін Зеленский Ұлыбританияға ұшып барды. Лондонда ертең Еуропа лидерлерінің саммиті өтеді.
Арай Төлегенқызы
