Жаңалықтарды Telegram арнамыздан оқыңыз!Ертең Қасиетті Рамазан айы басталып, 29 күнге созылады. Осыған орай Ұлттық арнаның «Бас тақырып» бағдарламасына Бас мүфти Наурызбай қажы Тағанұлы келіп, Қазақстан мұсылмандар діни басқармасының Рамазан айындағы жұмыс жоспарымен бөлісті. Мүфтият қасиетті айдың қарсаңында жаңа телеграм-ботты іске қосты. Бұдан бөлек тәулік бойы жұмыс істейтінін сall-орталыққа хабарласып ақпарат алуға болады.
Наурызбай қажы Тағанұлы, ҚМДБ төрағасы, Бас мүфти:
«30 күнге – 30 уағыз» деген уағыз бөлімінде арнайы бекітілген, мәтіні жазылған уағыздарды республика көлемінде бүкіл мешіт имамдарына таратамыз. Яғни уағыздың бәрі бір бағытта болса және уағыздарды өзіміздің ұлттық құндылықтарға көңіл бөлінсе деген мақсатта. Сондай-ақ оразаға қатысты әр күнге подкасттар түсіру. Осындай 30 күнге арналған 30 күндік арнайы жоспар бекітілген. Сол жоспармен, Алла қаласа, оразаны өткіземіз.
Ал нутрицолог мамандар ораза кезінде ең алдымен судың нормасын орындау керек дейді. Яғни ауыз ашқан бетте көп мөлшерде су ішіп, асқазанды тамаққа дайындау маңызды. Сондай-ақ қыс бітіп, көктем шығып жатқандықтан, қазір иммунитеттің әлсіз шағы. Сол себепті мамандар дәрумендерді ішуді тоқтатпауды ұсынады. Мәселен, майда еритін, яғни А,Д,Е,К дәрумендерін сәресінде ішсе сіңімділігі артады. Ал суда еритін дәрумендерді кешке, астан соң ішкен дұрыс. Жасөспірімдер, өтінде тасы бар адамдар, бүйрек жеткіліксіздігі бар науқастар мен онкологиялық диагнозы бар жандарға ауыз бекітуге мүлдем болмайды, дейді нутрицолог.
Салтанат Жолдасбекова, нутрицолог:
Ораза кезінде тамақты сәресінде көбірек жеу керек. Ауыз ашқан кезде аз тамақтану қажет. Яғни фокусты ақуыз өнімдеріне, салатқа және суға қою керек. Оған не жатады? Ет өнімдері, балық, тауық, жылқы еті, кез келген көкөністерден жасалған салаттар. Ал сәресінде міндетті түрде ақуыз болуы керек және май. Әсіресе сары майы, құйрық майды сәресіне жейтін болсақ, кешке дейін адам тоқ жүреді де, ауызашар уақытында көп тамақ жеуден сақтайды.
Ақниет Балтанова
