Жаңалықтарды Telegram арнамыздан оқыңыз!Алғашқылардың бірі болып жоғары білім алып, ағартушылықпен айналысқан қазақ қыздары. Бүгін «Қазақстан» телерадиокорпорациясы Астанада «Қазақ қызы» атты деректі фильмдер топтамасының таныстырылымын өткізді. Жоба қазақ әйелдері арасынан шыққан тұңғыш дәрігер Аққағаз Досжанова мен Гүлсім Асфендиярованың, алғашқы мұғалім, этнограф, аудармашы, журналист Нәзипа Құлжанова мен Хұсни-Жамал Нұрлыханованың өмір жолына арналған. Деректі фильмнің түсірілім жұмыстары Қазақстан, Өзбекстан, Ресей елдерін қамтып, 10-нан астам қалада жүргізілді және жобаға отандық, шетелдік 50-ден аса зерттеуші атсалысты. «Қазақ қызы» деректі фильмдер топтамасы «Qazaqstan» телеарнасынан 8-9 наурыз күндері сағат 15:25-те көрсетіледі.
Әлия Әшім, жоба авторы, журналист, документалист:
Әйел баласы - тек қана ана, әже, сіңілі, қарындас емес, бұл елдің қабырғасын қаласқан тұлға. Саясатта, білімде, ғылымда... Өнерді ғана көп білеміз. Сосын қолына қару алып, жауға шапқандарды білеміз әдетте. Әлия, Мәншүк, Томирис дегендей тұлғаларды білеміз. Бірақ біліммен, іліммен майдан жүргізген адамдар бар, сол майданда да әйелдердің барын көрсету - бізде мақсат болды.
Оңғар Алпысбайұлы
