Жаңалықтарды Telegram арнамыздан оқыңыз!Былтыр тасқыннан зардап шеккен Атырау облысы Құлсары қаласының тұрғындарының арасында өтемақысын ала алмай жүрген азаматтар бар. Тұрғындардың айтуынша үйіне су кірмегенімен, жерасты арқылы келген судан үйлердің қабырғасы жарыла бастаған. Олар: «қанша шағымдағанымызбен жергілікті әкімдік шара қолданбады», - деп отыр.
5 баланың анасы Жанар Есенованың үйі былтырғы тасқын кезінде аман қалды. Бірақ жерастымен келген су бәрібір баспанамызды бүлдірді дейді. Қабырғалары қақырап, іргетасы опырылған.
Жанар Есенова, Құлсары қаласының тұрғыны:
Биыл су келетін болса, мына үй опырылып кетеді. Үйіндінің астында, 5 баламмен далада қалып қоямын ба деп қорқып отырмын. Әкімдікке барып өтемақы сұрадым, жоқ деп отыр.
Жанар секілді өтемақы сұраған 250 шақты адам бар. Ал әкімдік өкілдері бұл мәселе тек сот арқылы ғана шешіледі. Қазір 140 іс қаралып жатыр дегенді алға тартты.
Жұмабек Қаражанов, Жылыой ауданының әкімі:
Қорытындысы бойынша Атырау гидрогеологияның 2023-24 жылдардағы көктемгі және күзгі кезеңді салыстырмалы түрде қарап шығарып берді. Бұл жерде жерасты суы көтерілмеді деген қорытынды берді. Қазіргі таңда оны сотқа ұсындық.
Апатты үйдің тұрғындары көшіруді сұрайды
Жылыой ауданда апатты деп танылған 80-нен астам үй бар. Басым көпшілігі өткен ғасырдың 40-жылдары салынған. Жұмағыз Демесінованың үйі тіптен тұруға жарамайды. Өйткені бір қабырғасы опырылып түскен. Төңіректе дәл осындай 16 үй бар. Оның 10 шақтысы құлаудың алдында тұр.
Жұмағыз Демесінова, Құлсары қаласының тұрғыны:
Амал жоқ бұл үйден кетуге тура келді. Қайда барамыз, кетпегенде не істейміз. Мұның қай жерінде тұрамыз. Ар жағына тұрайық десек, су ағып жатыр. Шоқпартоғайдағы інімнің үйін паналап отырмыз.
Серікболсын Қожанов, Құлсары қаласының тұрғыны:
Әрине жекеменшік үйді өзіміз баптап, майлап, сайлап ұстауға тиістіміз. Бірақ дей тұрғанмен, бұл үйлерді қанша жерден баптасаң да, самантас опырылып құлап жатыр. Фондумент жоқ мұның астында. Жаңбырға желініп, топырақ боп езіліп жатыр.
Әкімдік жағдайды жақсы біледі. Биыл тұрғындарды баспанамен қамтамасыз ету мақсатында бюджеттен 3 млрд теңге бөлінген. Мәслихатқа ұсыныс берілген. Жуық арада көпқабатты және жеке тұрғын-үйлердің құрылысы басталады.
Нұрболат Сарманов, Жылыой ауданы әкімінің орынбасары:
Техникалық сараптамамен апатты деп танылған үйлердің өзінде кезек бар. Сол кезек бойынша 36 жеке тұрғын үй, барак үйлер және 8 көпқабатты үй - барлығы 190 пәтерді осы 2025 жылға қойып отырмыз. 28 жылға дейін барлық апатты үйді кезең-кезеңімен жаңа үйге көшіреміз.
Жалпы, облыс бойынша 217 баспана тұруға жарамсыз. Жергілікті билік инвесторларды тартып, апатты үйлердің мәселесін біржола шешуді жоспарлап отыр.
Нұрсұлтан Нұрсейіт
