Жаңалықтарды Telegram арнамыздан оқыңыз!Тұрғын үйді сатып алу құқығынсыз жалға алған жастар «Отбасы банкінің» бағдарламаларына қатыса алады. Олар – «Алматы», «Елорда жастары», «Қамқор» бағдарламалары. Алматы филиалының директоры Данагүл Түсіпованың айтуынша, мұндай мүмкіндікті Алматы, Астана, Шымкент қалаларында мемлекеттен алған жалдамалы пәтерде тұрып келген азаматтар да қолдана алады.
Меруерт Төлеубекова бес жыл сатып алу құқығынсыз берілетін үйді ай сайын небәрі 15 мың теңгеге жалдап тұрған. Осы уақыт аралығында өз пәтерінің алғашқы жарнасына жеткілікті қаржыны жинап, «Алматы жастары» бағдарламасына қатысты. Былтыр баспанасына қол жеткізді.
Меруерт Төлеубекова, қала тұрғыны:
Енді мен айына 141 мың теңге төлеймін. Сатып алу құқығынсыз жалға берілетін баспана маған өте тиімді болды. Үлкен қалада 15 мың теңгеге пәтер жалдау мүмкін емес. Нәтижесінде мен алғашқы жарнамды, яғни 2 млн-ға жуық ақша жинап, жеке пәтерлі болдым.
«Алматы жастары» бағдарламасы басталғалы 6000-ға жуық адам баспаналы болды. Тек былтыр 1400-ге жуық жас маман қоныс тойын атап өткен. Олардың арасында жалдамалы үйде тұрып, алғашқы жарнаға жеткілікті қаражат жинап, пәтерлі болған 24 адам бар.
Данагүл Түсіпова, «Отбасы банк» АҚ Алматы қаласы филиалының директоры:
Жалпы, осы жалдамалы үйде тұрып жатқан жастарға пәтерлерді сатып алу бойынша ешқандай шек қойылмайды. Жастарымыз әртүрлі ипотекалық бағдарламаларға қатысып, сатып алуға құқықтары бар. Ай сайын төлейтін сомасы міндетті түрде қай бағдарламамен қатысатынына байланысты.
Бағдарламаға қатысушыға қойылатын шарттарда өзгеріс жоқ. Ең бастысы несие тарихы дұрыс болуы керек. Егер атында төлем уақыты өтіп кеткен берешегі болса, мүмкіндік берілмейді. Бұл жағдайда үміткер қарызды түгел өтеп, үш ай мерзімнен кейін төлем қабілеттілігін қайта тексеріп көруі қажет. Сатып алу құқығынсыз жалдамалы тұрғын үйде тұрып жатқан азаматтар жастар бағдарламаларынан бөлек, «Наурыз» бен өзге мемлекеттік бағдарламаларға да қатыса алады.
Айдана Қуантхан
