Қостанай облысында мал ұрлағандар ұсталды

Қостанай облысында ұйымдасып мал ұрлаған қылмыстық топ ұсталды. Жарты жыл бойы барымташылар Арқалық қаласына қарасты ауылдарға қырғидай тиіп, төрт түлікпен жан бағып отырған жұртты қан қақсатқан. Осы уақыт ішінде олар 14 сиыр мен 30 жылқыны ұрлап кетіпті. Барлық шығын көлемі 25 млн теңге деп есептеліп отыр. 5 адамнан тұратын қылмыстық топтың ең жасы 29-да, ең үлкені 59-да. Ұрылар сатып үлгермеген 15 жылқы иелеріне қайтарылды. Қалған шығын ақшалай өтеледі.

Ержан Бейісов, Облыстық ПД криминалдық полиция басқармасының жедел уәкілі:

Аса ірі мөлшерде мал ұрлауға байланысты полиция сотқа дейінгі тергеу жүргізуде. Күдіктілер қамауға алынды. Осы қылмысы үшін олар мүлкі тәркіленіп, 7 жылдан 12 жылға дейін бас бостандығынан айырылуы мүмкін.

Дәуренбек Әбдібек