Жаңалықтарды Telegram арнамыздан оқыңыз!Президенттік арнаулы әдеби сыйлықтың жеңімпаздары марапатталды. Байқауға туындылары бұрын ешқайда жарияланбаған 18 бен 35 жас аралағындағы қаламгерлер қатысып, 4 жеңімпаз сараланды. Атап айтсақ, «Проза» номинациясы бойынша «2026» шығармасы үшін Есбол Социалхан, «Драматургия» номинациясы бойынша «Апатай» туындысы үшін Әлішер Айтуар, «Поэзия» номинациясы бойынша «Боз ұштақ» өлеңдер жинағы үшін Жәнібек Әлиманов және «Балалар әдебиеті» номинациясы бойынша «Рокет Ера» повесі үшін Әсет Сыздықов жеңімпаз деп танылды. Оларға марапатпен қатар 4 млн теңгеден қаламақы табысталды.
Әлішер Айтуар, жазушы, драматург:
Президент сыйлығы ол жастарға үлкен мотивация береді деп есептеймін. Өйткені жастар үшін арнайы сыйлықтардың ең бюджет қоры көбі осы. Екінші жағынан жылда төрт-ақ адамға беріледі. Ол біз үшін оңайлықпен келмейді.Сондықтан жастарға үлкен мотивация – жақсы жазуға, көркем дүние жазуға.
Мәдениет және ақпарат министрі Аида Балаева Президенттік арнаулы әдеби сыйлық мәдениет саласын жүйелі түрде жаңғыртуға бағытталған бастама екенін атап өтті. Сонымен қатар жиында «Қазақстанның әдеби-танымдық панорамасы» жобасымен жарық көрген 20 жас қаламгердің кітаптарының тұсаукесері өтті. Министр жиналған ақын, жазушыларға оларға қоғамның моральдік бағыт-бағдарын айқындайтын рухани көшбасшы болу міндеті жүктелгенін жеткізді.
Аида Балаева, Мәдениет және ақпарат министрі:
Сіздер өз замандарыңыздың бейнесін жаңаша жазып, жаңа көзқарас қалыптастыруға тиіссіздер. Ұлы қаламгерлердің жолын жалғастырып қана қоймай, әдебиетті жаңа белеске көтеру – сіздердің қолдарыңызда. XX ғасырдағы әдебиет адамның жан әлемін тереңнен суреттесе, XXI ғасырдың қаламгерлері жаңа технологиялар дәуіріндегі адам тағдыры, жаһандану мен ұлттық болмыс, жеке тұлғаның күресі секілді тақырыптарға қалам тербеуі керек.
Нұрсұлтан Тілектес
