Жаңалықтарды Telegram арнамыздан оқыңыз!Атырау облысындағы Жылыой және Қызылқоға аудандарында су тасқыны қаупі басым. Мамандар гидрологиялық болжамдарға сәйкес, Қызылқоғадағы Ойыл, Ноғайты, Сағыз және Жылыойдағы Жем өзендерінен қауіптеніп отыр. Биылғы тасқынға дайындық жұмыстарына бюджеттен 3 млрд теңгеден астам қаражат бөлінген. Төтенше жағдайға қарсы 1500-ден аса адам мен 244 техника әзір тұр. Ал өзге де өңірлерде тасқынға қарсы дайындық жұмыстары қалай? Рет-ретімен әріптесім Нұрсұлтан Нұрсейіт баяндайды.
Нұрсұлтан Нұрсейіт, тілші:
Өткен жылы арнасынан тасып, жылыойлықтарды әбігерге салған Жем өзенінде қосымша бөгет нығайту, арналарды тереңдету жұмыстары жүріп жатыр. Ұзындығы 96 шақырымды құраса, қазір 80 шақырымында жұмыстар толық аяқталған.
Бұдан бөлек аудандағы су басу қаупі жоғары аумаққа ұзындығы 65 шақырым бөгет салу жоспарланған. Қазір соның 30 шақырымға жуығы дайын. Дәл осындай жұмыстар Қызылқоға, Индер, Махамбет аудандарында да жүріп жатыр. Ресейден басталатын Жайық өзені бірінші Индерге кеп ойысады. Өткен жылы мұндағы республикалық маңызы бар жолдардың көп бөлігін су шайған еді. Қазір 30 шақырым жол қайта қалпына келді. Индербор кентіне кіре беріс 7 шақырым жол да жөнделіп жатыр.
Шапағат Ғаббасов, аудандық ТҮКШ бөлім басшысы:
Бүгінгі күні бұл жұмыстардың 90 пайызы аяқталды. 4 мал өткелі салынды. Сонымен қатар бір суағар құбыры салынды.
Қызылорда облысындағы Сырдария өзенінде сең жүріп жатыр
Ал Қызылорда облысында Сырдария өзенінде сең жүре бастады. Өзендегі мұздықтар Қызылорда қаласы аумағынан ойысып, Жалағаш ауданының тұсына жетті. Су басу қаупі бар 29 учаске белгіленген. Өзенге жақын орналасқан елдімекендерге ескерту беріліп, тұрғындарды қабылдайтын эвакуациялық пункттер әзір тұр.
Бейбітхан Спанов, облыстық ТЖД басқарма бастығы:
Дария арнасы жайылғандықтан, тірелу салдары және қорғаныс бөгеттерінен шығып кету жағдайлары да болуы мүмкін. Осыған байланысты түнгі кезекшілік ұйымдастырылып, бақылау жұмыстары жүргізіліп жатыр.
Қостанайда құрамалы бөгет сынақтан өткізілді
Қостанай облысында тасқынға дайындық барысында құрамалы бөгет сынақтан өткізілді. Темір тордан жасалған құрылғы ішіне тас, құм толтырылып бекітіледі. Биіктігі – екі метр. Қажет болса, биіктетуге де болады. Ерекшелігі - жылжымалылығында. Яғни су басу қаупі төнген жерге апарып, жылдам құрастыруға болады. Сынақтан өткізу кезінде мамандар оны құрастырудың әдіс-тәсілдерімен іс жүзінде танысты.
Нұрсұлтан Нұрсейіт
