Жаңалықтарды Telegram арнамыздан оқыңыз!Осыдан 81 жыл бұрын шешен-ингуш халқы Қазақстанға жер аударылды. Жүз мыңдаған отбасы Орта Азияға қоныстанды. Кей деректерде Солтүстік Кавказдан келгендердің саны 500 мыңдай болған деседі. Күштеп қоныс аударылған халықтың әрбір төртіншісі көш кезінде және қоныстанудың алғашқы жылдарында қайтыс болды. Қазақ жерінен пана тапқан өзге ұлттар қазақтан көрген жақсылығын айтудан жалықпай келеді.
Атбасар және Сандықтау аудандарында шешен-ингуш ұлтының 5 мыңнан аса өкілі тұрады. Олар жергілікті қоғамдық іс-шараларға белсене араласады. Мысалға, Атбасардағы мешітті және медресені күрделі жөндеуден өткізуге атсалысқан. Бұл күні 1944 жылғы депортация құрбандарын еске алуға арналған шара ұйымдастырылды.
Аубакир Зарахов, зейнеткер:
Бүгін Құдайы беретін күн. Бүгінгі күн бізді жер аударған күн. Бәлен жыл өтті. Неше жыл болады 44 жылдан бері. Соған құдайы беріп жатырмыз. Амандыққа, саулыққа. Бейбітшілік болсын, тату болайық , жақсы болайық.
Құрбандарды еске алу шарасында Құран оқылып, қазақ халқына деген алғыс айтылды. Ақсақалдар бейбітшілік пен келісімнің мән-мағынасы мен қадірін айтты. Ауданда ұлтаралық мәдени байланыс одан әрі артып жатқанын жеткізді.
Дин-Магомед Асаев, Атбасар және Сандықтау ауданы «Вайнах» шешен-ингуш этномәдени орталығы» қоғамдық бірлестігінің төрағасы:
Бұл жерде көп ұлт тұрады. Бізде «Вайнах» деген ансамбль бар. Оның құрамында 28 бала болса, 18 ұлттан құралған. Сол лезгинка биін қазақ балалар біздің вайнахтардан артық билейді. Бізде барлық ұлт арасында татулық пен достық салтанат құрып тұр.
Шешендер мен ингуштар қазақтардың кеңдігін, қонақжайлығын қадірлейді. Қиын кезде демеу болып, бауырына басып, қаншама адамды аман алып қалған елге алғыс айтады.
Азамат Бейбітұлы
