Жаңалықтарды Telegram арнамыздан оқыңыз!Елімізде қар барысының саны 180-ге жуықтады. Биік тауларды мекен ететін түз тағысы өткен ғасырдың 80-жылдардағы популяциясына жақындап қалды, дейді мамандар. Ол кезде Қазақстандағы ілбіс саны 200-дің төңірегінде болған. Жыртқыш жануар әсіресе Алтынемел ұлттық табиғи паркі аумағында жиі кездесуде. Қазір мұнда Қызыл кітапқа енген мысықтұқымдас санының 20-дан асқаны дәлелденіп отыр.
Ғалымдардың зерттеулерінде Алтынмелде қар барысы 1950 жылдарға дейін мекендеді деген дерегі бар. Қазір бұл жер ерекше қорғалатын аймақ болғандықтан, мұнда ілбіс үшін азық қоры мол. Сондықтан да болар барыстар емін-еркін көбейіп, Алтынемел таулары жануардың ең көп шоғырланған аймағына айналып отыр.
Қуат Байтұрбаев, «Алтынемел» МҰТП бас директоры:
Қар барысы қазіргі уақытта көбейіп кетті. Қазір шамамен 26 бас осында жүр. Бұрын 17 бас деп жүруші едік, қазір көбейіп кетті де, жылқыларға шабуыл жасап жатыр.
Ғылыми зерттеу институтының мамандары да ел аумағындағы ілбістердің популяциясының артқанын растайды. Өткен ғасырдың соңында қар барысының саны екі есе азайып, 100-дің айналасында болған. Ал қазір керісінше, өсім байқалады. Алматы және Жетісу облысының тауларында қойылған фото және бейнетұзақтар соның айғағы.
Алексей Грачев, Зоология институтының зертхана меңгерушісі:
Соңғы 30 жылда елімізде ұлттық табиғи парктер мен қорықтардың көптеп құрылуы қар барысының санына оң әсерін тигізді десек болады. Іле және Жоңғар Алатауының қақ ортасы ретінде Алтынемел паркі бұл жануардың өсіп-өнуіне және емін-еркін жайылуына жақсы мекен. Қазір бұл жерде ілбістердің тұрақты бір тобы қалыптасып келеді.
Көктемде биік тауларға орнатылған бейнекамералардағы жазбалар тексеріледі. Мамандар қар барысының саны 180-нен де көп болуы мүмкін деген болжам айтуда.
Қуаныш Қанатұлы
