Маңғыстау облысында қар жауып, барлық жол қозғалысы тоқтады

Маңғыстауда күн райына байланысты барлық жол қозғалысы тоқтады. Облыс орталығы Ақтау қаласынан көліктердің шығуына тыйым салынған. Сондай-ақ басқа өңірлермен және шет елмен шектесетін Бейнеу, Жаңаөзен қаласынан орталыққа қатынайтын жолдар жабылды. Аягөз Оралбайқызы аймақтағы ахуалды жеткізуге әзір.

Аягөз Оралбайқызы, тілші:

Қайырлы күн, Дархан, облыс аумағында кей жерлерде толассыз қар жауып, жел күшейіп, көктайғақ болатынын «Қазгидромет» мамандары алдын ала болжап, хабарлаған еді. Сол айтқандай қар түнде жауа бастады. Өңірге шамамен 4 -7 мм қар түскен. Осыған орай тұрғындардың қауіпсіздігі үшін, Атырау – Маңғыстау бағытындағы жол жабылды. Яғни Бейнеуден Ақтауға қатынас тоқтатылды. «Жетібай – Жаңаөзен – Өзбекстан» шекарасы бағытындағы жол да жабық. Ақтаудан Құрыққа бару да мүмкін емес. Ал жолдардың қашан ашылатыны әзірге белгісіз.

- Аягөз, Ақтау қаласында жол қозғалысы қалай болып жатыр?

- Ақтауда жолдың қарын күреп, түнімен құм-тұз себілді. Коммуналдық мекеменің қызметкерлері жолдың жоғары өрлейтін, қауіпті деген жерлеріне 130 тонна құм-тұз аралас қоспасын сеуіп шыққан. Қазір көлік қозғалысы қалыпты. Айта кетейін, синоптиктер алдағы бір апта көлемінде осындай ауа-райы сақталатынын айтуда. Бүгін түстен кейін жел күшеймек.