«Жомарт» кенішінде табиғи газ жарылған

«Қазақмыс» корпорациясының мәліметінше, кеніште табиғи газ жарылған. Біздің Қарағанды қаласындағы түсіру тобымыз «Жомарт» кенішіне жету үшін түнде жолға шыққан болатын. Он сағат дегенде Жезқазған қаласына жетті.

Жандос Бақытұлы, тілші:

Апат болған аумақ біз тұрған Жезқазған қаласынан 200 шақырым жерде. Жол нашар болғандықтан, діттеген жерге дейін әлі екі сағаттан астам жүруге тура келеді. «Жомарт» кеніші 2006 жылы қолданысқа берілген, онда мыс сульфиді өндірледі. Түнде оқиға орнына жеткен құтқарушылар айналасы 4 сағаттың ішінде топырақ астында қалған 6 жұмысшының денесін алып шықты. Араға 1 сағат салып, тағы бір адамның мәйіті табылды. Сот медициналық сараптама жасау үшін жұмысшылардың денесі полицияға тапсырылды. Қазір ол жақта арнайы штаб жұмыс істеуде. Ұлытаудан бөлек Қарағанды облысынан арнайы келген төтенше жағдайлар қызметкерлері де кеніш басында. Астанадан дәрігерлер мен психологтар келіп, көмек көрсетуде. Әзірге бар ақпарат осы. Алдағы уақытта «Жомарт» кенішінен тікелей байланысқа қосыламыз.

Жандос Бақтұлы