Семейде Құнанбай Өскенбайұлына көше аты беріледі

Семейде 12 көшенің аты өзгеруі мүмкін. Тарихи тұрғыдан әбден ескіргені жаңаланбақ. Жергілікті ономастикалық комиссия қандай көшелер өзгеретінін қарастырып қойған. Жақында қоғамдық тыңдау болып, ұсыныс республикалық комиссияға жолданады. Семейде әбден ескірген атаулар толып жатыр. Мысалы Крестьянская, Первомайская, Советская, Энгельс сынды көшелер әлі күнге дейін бар. Енді олардың орнына Құнанбай Өскенбайұлы, Кеңгірбай Жандосұлы, Әнуарбек Байжанбаев, Жұмат Шанин, Рақымжан Қошқарбаев сынды тұлғалардың аты берілмек.

Әсел Әбілқасымова, Семей қаласының мәдениет және тілдерді дамыту бөлімі басшысының орынбасары:

Биыл Абай Құнанбайұлының 180 жылдығына орай осы Құнанбай Өскенбайұлына көше беру жоспарланып отыр. Сол мәселе қаралатын болады, 1200-ге жуық көше бар. Соның едәуірі тарихи тұрғыдан ескірген көшелер. Олар кезең-кезеңімен өзгертілетін болады.

Ержан Жақып