Босып кеткен палестиналықтар үйіне орала бастады

Газа секторында жүздеген мың палестиналық үйіне оралып жатыр. Олардың көбі анклавтың солтүстігіне жаяу аттанды. Бірақ күні-түні жүріп, шаршап-шалдыққан халықты үй емес, үйінділер күтіп тұр. Газада 2023 жылы қазанның 7-де басталған соғыс 650 мыңдай палестиналықты баспанасынан айырды. Олар Израиль мен «Хамас» өткен аптада атысты тоқтатуға келіскеннен кейін ғана өз кварталдарына жол тартты.

Біріккен Ұлттар Ұйымының дерегінше, кешеден бері Газаның теріскейіне кемінде 200 мың адам аттанды. Олардың арасында әйелдер мен балалар көп. «Хамастың» есебінше, үйіне қайтып жатқан палестиналықтарға қазір шамамен 135 мың шатыр керек.

Арыстан Рысбек