Жаңалықтарды Telegram арнамыздан оқыңыз!Енді еліміздегі заңнамаға «Тәлімгерлік жөніндегі ұйым» ұғымы енгізілетін болды. Бүгін Парламент Сенатында «Мәдениет, білім беру және тәлімгерлік мәселелері бойынша» заң мақұлданды. Оның аясында жетім және ата-анасының қамқорлығынсыз қалған балаларға тәлімгерлік институтын реттеу үшін аталған ұйым қолданылады. Бірақ үміткерлер міндетті түрде тәлімгерлік бойынша оқудан өтеді.
Мәулен Әшімбаев, Сенат Төрағасы:
Қаралған заң тәлімгерлік институтының рөлін күшейтуді, сондай-ақ білім және мәдениет саласындағы заңнаманы одан әрі жетілдіруді көздейді. Заң арқылы жетім және ата-анасының қамқорлығынсыз қалған балаларға тәлімгер болуға ниетті адамдарды оқытатын арнайы ұйымдардың мәртебесі, құқықтары мен міндеттері бекітілді.
Бұдан бөлек заңға енгізілген өзгертулердің ішінде ұлттық сөздік қоры мен қазақ тілінің ұлттық корпусын құру туралы ережелер бар. Сондай-ақ халықаралық ғылыми жобалар конкурстарының жеңімпаздары болған оқушыларға мемлекеттік білім беру гранттарын конкурстан тыс беру жөніндегі шешім қабылданды.
Азамат Бейбітұлы
