Жаңалықтарды Telegram арнамыздан оқыңыз!Қарағанды тас жолында жағдай күрделі. Ауа райының қолайсыздығынан мыңнан аса көлік әлі жолда кептеліп тұр. Полиция күшейтілген режимде жұмыс істеп, жүргізушілерге көмектесіп жатыр. Жалпы, кешеден бері бірнеше республикалық маңызы бар бірнеше тас жол жабылып, мамандар көліктерді кері қайтарып жатыр. Қазір әр өңірдегі ахуал жайлы тілшілер тікелей эфирге шығып айтып беруге дайын тұр. Алдымен, Астанадағы әріптесімнен сұрайын. Нұрсұлтан, бүгін әуежай уақытша жабылып еді, қазіргі жағдай қалай?
Нұрсұлтан Тілектес, тілші:
Әуежай таңертең екі сағатқа жабылып, бірқатар рейс кейінге шегерілген болатын. Қазір аумақ ашылды, онда қар тазалау жұмыстары жалғасып, ұшақтардың ұшуы мен қонуы реттеліп жатыр. Қазір жағдай тас жолдарда қиын. «Астана-Қарағанды» автожолында мыңнан астам көлік кептелісте тұр. Соңғы ақпарат бойынша, 527 жеңіл, 500 жүк көлігі және 9 қоғамдық көлік жолда қалған. Полицейлер оларға көмектесіп жатыр. Ал Астанадан шығатын бірнеше тас жол әлі жабық. Күндіз «Астана-Қарағанды» автожолына барып, жағдайды көріп қайтқан едік. Таңнан бері елордадан көрші өңірге шыққан көліктер Күйгенжар бекетінен кері қайтарылып жатты. Мұндай кезде жолға шығудың өте қауіпті екенін полицейлер жүргізушілерге қайта-қайта түсіндірді.
Еркебұлан Қайырбеков, Астана қаласы ПД мамандандырылған батальонның аға қызметкері
Бәріне түсіндірме жұмыстарын жүргізіп, жүк көліктерін мына жерде үлкен тұрақ бар соған кіргіздік. Жанында тамақ ішетін жерлер бар. Тас жол кеше кешкісінен бастап жабық. Қашанға дейін жабық болатыны белгісіз.
Нұрсұлтан Тілектес, тілші:
«ҚазАвтожолдың» мәліметінше, қазір 19 республикалық маңызы бар тас жолдарда көлік қозғалысы шектелген. Жолды қардан тазартып, қозғалысты реттеу үшін 600 маман мен 1 мыңнан астам техника жұмыс істеп жатыр. Мамандар жүргізушілерден алыс жолға шықпауын сұрайды. Егер жолда қалып қойсаңыз тәулік бойы 1403 байланыс нөміріне хабарласуға болады.
Нұрсұлтан Тілектес
