Жамбыл облысында «Жібек жолы» АЭА-нан 2 млрд ₸ ұрланған

Жамбыл облысында «Жібек жолы» арнайы экономикалық аймағынан 2 млрд теңге ұрланған. Мердігерлердің қыруар қаржыны қолды қылғанын прокурорлар анықтады.

Қаржыға инвесторлар үшін инфрақұрылым нысандары салынуы керек еді. Бұл мақсатқа бас-аяғы 31 млрд теңге бөлінген. 28 нысан бой көтеру керек. Бірақ 12 ғимараттың құрылысы аяқсыз қалды. Жұмысына жауапсыз қараған 3 компания басшысы тергеуге алынды. Негізі 6 жыл бұрын экономикалық аумақта 20 инвестор жұмысын бастауы керек еді. Алайда автожол, полигон, су мен жарық желілері толық тартылмағандықтан жобалар жүзеге аспай тұр.

Қайыржан Қуатбеков, Шу ауданының прокуроры:

Міндеттемелерді орындамаған мердігер ұйымдарынан 2 млрд теңге өндірілді. Қадағалау актісі бойынша 6 өнімсіз жобаларға берілген 81 гектардан аса жер учаскесі арнайы экономикалық аймаққа қайтарылып, жаңа инвесторларға берілді. Инвесторлардың құқықтарын қорғау жұмыстары жалғасуда.

Данияр Әлімқұл