Дроптар – Қазақстандағы қаржылық алаяқтықтың жаңа түрі

Қазақстанда дроптар алаяқтығы көбейіп жатыр. Қаржылық мониторинг агенттігінің мәліметінше, былтыр 6 мың 200 дроп-карта анықталған. Ал жалпы қаржы айналымы 24 миллиард теңгеге жуықтайды. Банк картасы немесе шоттарды заңсыз мақсатта қолдануға беретін тұлғалар дроптар деп аталады. Мәселен, есірткі саудасы, кибералаяқтық, заңсыз құмар ойындары және басқа да қылмыспен айналысушылар өзге бір адамның картасына не шотына ақша аударады. Сөйтіп, қылмыскерлер ізін жасырады. Ал дропқа картасын пайдалануға бергені үшін белгілі бір сомада сыйақы береді. Сондықтан да 10-нан аса банк картасы бар жеке тұлғаларды тексеру жұмыстары күшейтілген. 

Қаракөз Тұрмағанбет