Жаңалықтарды Telegram арнамыздан оқыңыз!Оңтүстік өңірлерде кешеден бері қыс қаһарына мініп, жол жүру мүмкін болмады. Республикалық маңызы бар жолдар жабылып, жүргізушілер сағаттап қозғалыссыз қалды.
Кеше кешкі сағат 17:00-ден бастап «Батыс Еуропа – Батыс Қытай» автодәлізінде қаңтарылған көліктің қарасы көбейді. Тараздан Шымкентке шығып, Алматы асу мүмкін болмады. Бұрқасыннан Қордай және Жуалы ауданында мыңнан аса көлік қаңтарылып қалды. Оның 600-ге жуығы жүк көлігі. Қысы қалың Жуалыда ескертуді елемей жолға шыққан 40 адам құтқарылды. Оның 20-сы бала. 100-ге жуық полицей құтқарушылармен бірлесіп, 10-нан аса көлікті қар құрсауынан алып шықты. Ал жолаушылардың тазалау жұмыстарына көңілі толмайды.
Абзал Құрманов, Тараз қалалық Полиция басқармасы патрульдік полиция батальонының взвод командирі:
Жүзге жуық жүргізушілер мен жолаушылар жылыту орнына жеткізіліп, ыстық шәймен қамтамасыз етілді. Таңға дейін тынымсыз жұмыс атқарудың арқасында қазіргі таңда яғни, 8 қаңтар сағат 11:00 шамасында Шымкент бағытына қарай жол ашылды.
Жақыпжан Ибрагимов, жүргізуші:
Мына жолда техника жоқ, тазалап жүрген бір-ақ КамАЗ. Жамбыл облысы тазалап жатыр, Түркістан облысы мүлде тазалап жатқан жоқ. Сәлемдеме: «ҚазАвтожол»! Тазалаңыздар! Ақшаны не үшін төлеп жатырмыз?
Қызылорда облысында да жаңбыр аралас қар жауып, жолда көлік қозғалысы қиындады. Көктайғақтың салдарынан 10-нан аса жол-көлік оқиғасы тіркелген. Әсіресе күре жолда 4 жүк көлігі соқтығысып, аударылып қалды. Соның бірінде «МAN» жүк көлігінің тіркемесі жол қауіпсіздігін қамтамасыз етуге шыққан патрульдік полиция автокөлігінің үстіне түсіп, тағы бір көлікті басып қалған. 2 полиция қызметкері мен 2 жолаушы ауруханаға жеткізілді. Жалпы, күре жолға құм аралас тұз себу жұмыстары жүргізілгенше жол жабылып, мыңға жуық автокөлікке көмек көрсетілді. Қазір «Батыс Еуропа – Батыс Қытай» автобанның облыс аумағындағы бөлігі ашық. Дегенмен мамандар жүргізушілерге жол қауіпсіздігін қатаң сақтауды ескертеді.
Данияр Әлімқұл
