Тибетте жер сілкінісі құрбандарының саны 95-ке жетті

Соңғы ақпаратқа сай, Қытайдың Тибетінде жер сілкінісі құрбандарының саны 95-ке жетті. Тағы 130 адам жараланған. Бүгін Гималайдың солтүстік бөктерінде қуаты 6,8 баллдық зілзала болды. Одан көршілес Непал, Бутан, Үндістанда да ғимараттар теңселген. Дүмпуден Тибеттің Шигатсе қаласы қатты зардап шекті. Қазір іздеу-құтқару операциялары жалғасып жатыр. Сейсмологтардың мәлімдеуінше, жер сілкінісінің эпицентрі Эверестке апаратын жолдағы Тингри елді мекені маңында 10 шақырым тереңдікте анықталған. Мұны Қытайдың Зілзала желілері орталығы хабарлады. Ал АҚШ-тың Геологиялық қызметінің дерегінше, жер сілкінісінің магнитудасы 7,1 баллға жеткен.

Арыстан Рысбек