Жаңалықтарды Telegram арнамыздан оқыңыз!Бүгін Кеңес одағының батыры, жазушы, Екінші дүниежүзілік соғыстың даңқты жауынгері Бауыржан Момышұлының туғанына 114 жыл. Елордада айтулы күнге орай аты аңызға айналған әскери қолбасшының ескерткішіне гүл шоғын қою рәсімі өтті.
Шараға отандық әскери құрылымдардың ардагерлері мен жас сарбаздар, тарихшылар, қазақстан халықтар ассамблеясының мүшелері қатысты. Айта кетейік, даңқты батыр 1941 жылы 316 атқыштар дивизиясының құрамында майданға аттанды. Батальон, полк командирі қызметтерін атқарды. Мәскеу үшін шайқаста 207 рет ұрысқа араласқан. Бес рет қоршауда қалып, жеті рет жарақаттанған. Алайда, оның батылдығы жеңіске жетелеп тұрды дейді тарихшы-этнограф.
Әміржан Әлпейісов, тарихшы, әдебиетші:
Адамның адам болуы, адамның батыр болуы, елін-жерін сүюі оның мінезінен дейді. Сондықтан осындай мінезді, парасатты, ұлтшыл болған біздің батыр бабамыз Бауыржан Момышұлы. Оның істеген ісі, өмірі – жас ұрпақтың көзі болуы керек.
Шараға қатысушылар Астанадағы «Жерұйық» саябағында Кеңес Одағының батыры Иван Панфиловтың ескерткішіне де арнайы барып, гүл шоқтарын қойды.
Аида Ахметбек
