Жаңалықтарды Telegram арнамыздан оқыңыз!Екібастұзда теміржол кластері қарқын алды. Шаһарда шойын жолға қажетті 50-ге тарта өнім шығарылады. Импортқа тосқауыл қойып, экспорттық әлеуеті артқан кәсіпорында бастапқыда 450 адам тұрақты жұмыс істейді, деп жоспарланған. Ал бүгінде 900 адам еңбек етеді. Әріптесім Болат Аманбаев өндіріс орнына арнайы барды.
Инновациялық өндіріс деген осы. Ат шаптырым алаңдарда адам жоқ. Тек роботтар. Алып темірлерді көтереді, балқытады. Дайын өнім жасайды.
Болат Аманбаев, тілші:
Бұл штангалардың әр қайсысының салмағы 10-12 тонна. Осылардан кесіп алынған металл балқымаларынан мына прес арқылы сағатына 45 теміржол дөңгелегі шығарылады. Ал тәулігіне 900 тіпті, 1000 дөңгелекке дейін жасалады. Бұл енді заманауи технологияның арқасы.
Кәсіпорын бастапқыда 957 номерлі жүк вагондарына арналған стандартты дөңгелек қана жасайтын. Өндірісті әртараптандыру арқылы қазір теміржол дөңгелегінің 10-ға тарта түрін шығарып жатыр. Олар тек диаметрі арқылы ғана емес, конфигурациясының алуандығымен ерекшеленеді.
Дмитрий Головченко, технологиялық басқарма басшысы:
Біз қазір 800-1000 диаметрлік тісті дөңгелектердің қалыбын жасап қойдық. Одан басқа электровоздармен жылдам жүретін поездарға арналған 1250 милиметрлік аса үлкен дөңгелектер шығаруға көштік. Өндірісті автоматтандырудың және роботтардың қызметіне жүгінудің нәтижесі деп айтуға болады бұны.
Өндіріске қажетті шикізаттың 70 пайызы - отандық өнім. Қазақстандық үлесті алдағы уақытта 90 пайызға жеткізбек. Ең бастысы кәсіпорында күрделі технологияны игеретін маман дайындау осы бастан ойластырылған.
Иван Дычко, кәсіпорынның бас директоры:
Бүгінгі күні біз әлеуметтік бағдарламаларға ерекше мән беріп отырмыз. Теміржол кластері алаңына жас мамандарды тартып, оларды бірден кәсіби білімдерін жетілдіруге жібереміз. Бастапқыда шет елден мамандар әкелдік. Олардан тәжірибе алып, өзіміздің жергілікті кадрлармен алмастырдық. Қазіргі қарқынды біз оқыған мамандарымыздың арқасында ғана ұстап тұра аламыз.
Елде көлік инфрақұрылымы жаңаша сипатта дамып келеді. Қазір теміржол арқылы жүк тасымалдауды дамыту үшін 4 ірі темір жол нысаны салынуда. Жұмыстың 75 пайызы аяқталған. Бұдан бөлек жобалардың инновациялық навигаторы әзірленді. Жаңа платформа арқылы жалпы құны 33 трлн. теңге болатын 755 инвестициялық жоба көзделген. Жуырда 150 мың жаңа жұмыс орнын ашылмақ.
Болат Аманбаев
