Аягөзде 10 мыңға жуық абонент жарықсыз қалды

Абай облысы, Аягөз қаласында қосалқы станцияда өрт шығып 10 мыңға жуық абонент жарықсыз қалған. Кеше кешке болған апаттан Аягөз қаласымен қоса 5 ауыл, сондай-ақ Үржар, Мақаншы аудандарында түгелдей жарық өшкен. Мамандар екі сағатқа жуық уақытта өртті сөндіргеннен кейін Үржар мен Мақаншыда, сондай-ақ Аягөз ауданының елді мекендерінде жарық қалына келтірілген. Алайда қаланың тең жартысы мен іргелес Мамырсу ауылында әлі электр энергиясы жоқ.

Мамандар ең бастысы шаһарды жылумен қамтитын 6 қазандық қатып қалмас үшін, оларды қосалқы трансформаторларға қосқан. Арнайы штаб құрылып апаттың салдарын жою әлі жалғасып жатыр.

Димитрий Гариков облыс әкімінің орынбасары:

Қазір Аягөз қаласы бойынша 9900 абонент жарықсыз отыр. 9 мыңнан астамы тұрғындар, 400 ге жуық заңды тұлғалардың нысандары бар. Қазір қалыпқа келтіру жұмыстарымен 40 маман шұғылданып жатыр. Кешкі сағат 21:00 ге дейін электр энергиясы толық берілуі тиіс. 

Ержан Жақып