Ел бойынша «Жасыл балабақша» бағыты дамып келеді

Білім берудің барлық деңгейінде экологиялық мәдениетті насихаттау аса маңызды. Қазір елімізде 11 мыңнан астам мектепке дейінгі ұйым болса, соның 77-сі «Жасыл балабақша» бағытында жұмыс істейді. Оқыту бағдарламалары толықтай экологиялық тақырыптармен интеграцияланған. Онда балалар экологиялық мазмұндағы ойындар, викториналар, түрлі эксперименттер мен экскурсияларға қатысады. Осы арқылы бүлдіршіннің танымдық қызығушылығы қалыптасып, сауатты, жауапты азамат болып өсуіне ықпал етеді.

Манара Адамова, Оқу-ағарту министрлігі Мектепке дейінгі білім департаментінің директоры:

«Жасыл балабақшаны» ашу тек өсімдіктерді күтіп баптау немесе біздің жасыл әлемімізді қорғау деген шектеулі бағыттағы мақсатты көздемейді. Ол кең ауқымда қарастырылады. Жалпы балалардың барлығын ұқыптылыққа, үнемділікке, қоршаған ортаны қорғауға, тазалықты сақтауға тәрбиелеу. Мұндай балабақшалар желісі әлемде өте көп және де әр елдің өзінің тәжірибесі бар, өз мақсаты бар.

Серік Жұмабек