Жаңалықтарды Telegram арнамыздан оқыңыз!Риддер қаласына үш тәулікте 1 метрге жуық қар жауды. Дегенмен қаладағы жол тазалығына жауапты коммуналдық мекеме мамандары тоқтаусыз жұмыс істеп жатыр. Нәтижесінде бүгінге дейін 5 мың текше метр қар шығарылған. Ал шағын шаһарда биыл жылу мәселесі де толық шешілді.
Қарашаның алғашқы аптасында-ақ Риддерге бір метр қар жауып қалды. Бұл шамамен бір айлық мөлшер. Тіпті шеткі шағын аудандарға жол болмай қалған. Дегенмен коммуналдық мекеме барлық арнайы техниканы жұмылдырып, жолды дер кезінде ашты.
Рауан Құрметұлы, Риддер қаласы ТҮКШ бөлімінің басшысы:
Біз бірінші кезекте қоғамдық көлік жүретін негізгі көшелер мен әлеуметтік нысандардың маңындағы қарды шығардық. Қазір арнайы техникамен жеке секторлардың қарын шығарып жатырмыз.
Жалпы Риддер қаласының ішінде 580 шақырым жол болса, оның 134 шақырымының қары шығарылады. Соңғы екі жыл ыстық су мен жылуға жарымаған риддерліктер алдағы қыстан қысылмай шығамыз ба, деп үміттеніп отыр.
Галина Глинова, Риддер қаласының тұрғыны:
Жылуға қатысты ешкімнің шағымданып жатқанын естімедім. Енді ішкі жылу құбыры мен батареяларын жаңаламаған жекелеген пәтер иелері болуы мүмкін. Биыл орталық құбыр жүйесін жаңаланып, диаметрі үлкен құбыр тартты. Нәтижесінде үйіміз жылынды.
Риддердегі 130 шақырымдық жылу құбырының биыл 19 шақырымы жаңаланды. Ал жылыту орталығын жаңғыртуға биыл республикалық бюджеттен 8 миллиард 600 миллион теңге бөлінді. Нәтижесінде 6 қазандықтың төртеуі толық жөнделді.
Мергүл Нұржанқызы, Риддер қаласының тұрғыны:
Иә алдыңғы жылдары суық болғаны рас. Қазірі кезде үйіміз жылы. Өйткені бәрі ауысқан.
Қалың қардың кесірінен коммуналдық нысанның арнасына мұз кептеліп соңғы бірнеше тәулікте қалада суық суда іркіліс болған. Дегенмен мамандар барлық күшті жұмылдырып, бүгін түстен кейін шаһарға су беріле бастады.
Олжас Керейхан
