75 мектеп заманауи қауіпсіздік жүйесіне қосылған

Көкшетауда полицейлерге 22 қызметтік көлік берілді. Жаңа темір тұлпарлар тұтастай заманауи құрылғылармен жабдықталған. Ақмола облысына барған Сенат депутаттары жергілікті полиция қызметінің материалдық техникалық базасын көрді.

Сондай-ақ, депутаттар қаладағы мектептердің қауіпсіздік жүйесімен де танысты. Өңірде 75 білім ордасында арнайы қондырғы орнатылған. Онда оқушылар туралы барлық мәлімет бар. Мектепке кіріп-шыққандар жайлы ақпарат жүйеде тіркеледі. Бейнебақылау камералары да тәулік бойы жұмыс істейді. Жыл соңына дейін дәл осындай қауіпсіздік жүйесі тағы 20 білім ордасына орнатылмақ.

Нұрлан Бекназаров, ҚР Парламенті Сенатының депутаты:

Цифрландыру дамығаннан кейін барлық өңірде, барлық жерде әртүрлі бақылау камераларын пайдалану бағдарламалары бар. Соларды тарату, пайдалануын кеңейтіп, оны барлық құзырлы органдардың орталығына енгізіп, бір жүйеде болуын, бір-бірімен ақпарат алмасуын, жедел түрде әрекет жасау мәселесін көтереміз.