Еуропа елдері инклюзивті білімді дамытуға күш салуда

Еуропа елдерінде мүмкіндігі шектеулі балалардың 90 пайызы жалпы білім беретін мектептерде оқиды. Сыныптағы жиырма оқушының үшеуі ерекше бала. Медициналық диагнозына байланысты оларға жалпылама, интенсивті және арнайы оқу бағдарламасы әзірленген. Мүгедек балалармен жұмыс істеу үшін мұғалімдер екі айлық арнайы дайындық курсынан өтеді. Сабақ кезінде оқушылардың үлгеріміне көмектесу үшін психологтар, әлеуметтік қызметкерлер мен арнайы орталықтың мамандары жұмылдырылған. Қазір қарт құрлық елдерінде мүгедектерге арналған арнайы мектептер жабылып, мүмкіндігі шектеулі балалаларды қоғамға бейімдеу жұмысы қызған.

Натан Пелигер, 9-сынып оқушысы:

Мұғалімнің көмекшісі жазуға көмектеседі. Мен сыныптастарым тарапынан ешқандай кемсіту көрген емеспін. Қайта олар маған үнемі қолдау көрсетіп, жігерлендіріп отырады.

Северин Мойэ, мұғалім:

Ерекше балалармен жұмыс істеу табандылықты талап етеді. Толерантты қоғам қалыптастыру үшін мүмкіндігі шектеулі жандарды қоғамға бейімдеуді күшейтуіміз керек. Олар өзін ешкімнен кем сезінбей, бәрімен тең құқылы екенін түсіндіруге тырысамыз. Инклюзивті білімді дамыту әлеуметтік оқшаулануды азайтып, мүгедектердің экономикалық жағынан тәуелсіз болуына ықпал етеді.