Жаңалықтарды Telegram арнамыздан оқыңыз!Бүгін Павлодарда да дүлей дауыл соқты. Салдарынан ағаш құлап, 67 жастағы әйел мерт болды. Құтқарушылар мен жедел жәрдем қызметі марқұмға алғашқы медициналық көмек көрсеткен. Алайда зейнеткер ауыр жарақат салдарынан қайтыс болды. Еліміздің басқа аймақтарында да табиғат тосын мінез танытып, арнайы қызмет мамандарын әбігерге салды.
Керекуде желдің жылдамдығы секундына 30 метрге дейін жетті. Құлаған ағаштар Павлодар ғана емес, Екібастұз қаласында да көліктерге зақым келтірді. Облыс орталығында бірнеше шағын аудан тұрғындары ауыз сусыз қалды.
Қарағандыда қатты жел соғып, үйлердің шатыры ұшты. Бірнеше елдімекен жарықсыз қалды. Мамандар қолайсыз ауа райы жөндеу жұмыстарына кедергі келтіріп жатқанын айтты. Қар құрсауында қалған 7 адам құтқарылды.
Ал Ақтөбе облысының полицейлері жолда қалған Тәжікстан азаматтарына көмек көрсетті. «Самара-Шымкент» тас жолында рейстік автобус тұрып қалған. Қарлы боранның салдарынан бес бағыт бойынша жолдар жабылған еді. Төтенше жағдайлар департаментінің өкілдері далада қалған басқа да жолаушыларды қауіпсіз жерге жеткізді.
Аслан Арзымбетов, ТЖД Төтенше жағдайларды жою басқармасы бастығының міндетін атқарушы:
Қазір колоннамен жүріп жатыр. Ақтөбе қаласынан Хромтауға дейін жол ашық. Хромтау қаласынан Қарабұтақ бағытына жабық.
Ақмола облысында полицейлер жолда қалған 700-ден астам көлікті колоналарға бөліп, діттеген жеріне жеткізді. Өңірде ауа райының күрт нашарлауына байланысты 6 республикалық және 14 облыстық бағыттағы жолдар жабылған еді. Блокбекеттер қойылып, 300-ге жуық жылыту пункті ашылды. Кешеден бері Көкшетаудың өзінде ғана көшеде жарақат алған 100-ден астам адам дәрігер көмегіне жүгінген.
Елдос Қайыржанов, травматолог:
Түске дейін көбіне зейнеткерлер болды. Өздері таңертең серуендеуге шығып жүрген. Байқаусызда құлап жатыр. Сосын балаларын мектепке, балабақшаға апарғандар болды.
Ақтауда толассыз жауын салдарынан жолдарды су басты. Салдарынан көлік қозғалысы қиындап, кептеліс басталды. Коммуналдық мекемелер 550 текше метр су сорған.
Солтүстік Қазақстан облысында ауа райының қолайсыздығына байланысты дауылды ескерту жарияланды. Кей аудандарда желдің екпіні секундына 28 метрге дейін жетті.
Облыс жолдарында үш ірі жол апаты тіркелді. Жарақат алғандар бар. Оларға медициналық көмек көрсетілді.
Эльмира Кәленова, тілші:
Солтүстік Қазақстанда бір тәулікте қардың 10 күндік мөлшері жауды. Боран қарлы жаңбырға ұласып, жолдар көктайғаққа айналды. Синоптиктер болжамынша ертең күн ашылады. Ал демалыс күндері тағы да боран болуы ықтимал.
Эльмира Кәленова
