Ақтөбе облысында жолда қалған 10 адам құтқарылды

Ақтөбе облысында жолда қалған 10 адам құтқарылды. Кешелі бері өңірде қарлы боран соғып тұр.

Түнде республикалық маңыздағы 5 автожол уақытша жабылды. Төтенше жағдайлар департаментінде қолайсыз ауа райына байланысты жедел штаб құрылды. Мамандар қар құрсауында қалған 10 адамды қауіпсіз аумаққа жеткізді.

Сондай-ақ, Хромтау ауданында мал бағып жүріп, адасып кеткен екі адамды тауып, аман-есен елді мекенге жеткізді. Боран мен көктайғақтың салдарынан жолдарда көлік апаты да жиілеген. Полиция департаментінің отыздан астам патрулі тәулік бойы кезекшілікте жүр.

Жақсыбек Кемал