Жаңалықтарды Telegram арнамыздан оқыңыз!Халқымыздың еркіндігі мен бостандығының кепілі болған республика күні ұлттық мерекесіне орай Шымкентте патриоттар форумы өтті. Асқақ рухты тербеткен жиында танымал тұлғалар Тәуелсіздік тартулары мен жетістіктері туралы толғана айтып, жыл бойына рәміздерді насихаттаған байқау қорытындыланды.
Сейдалы Дүйсебай өңірдің тарихи орындары мен биік шыңдарға шыққан сайын еліміздің көк байрағын осылай көпшілік ортада желбіретіп жүреді. Бұл өлкетанушы маманның жылдар бойғы жаңылмайтын дағдысы.
Сейдалы Дүйсебай, тарихшы-өлкетанушы:
Көрікті жердің ортасында Ту көркін одан да асырады. Ол кезде сезім шарықтаған үстіне шарықтай түседі.
Форумға Сейдалы секілді мемлекеттігіміздің қастерлі нышандарына айрықша құрмет көрсетіп, оны спорттық сайыстар мен көпшілік ортада тұғырға шығарып жүрген азаматтар жиылды. Рәміздерді насихаттау мақсатында ұйымдастырылған «Үздік пост», «Үздік бейнеролик» және «Үздік іс-шара» байқауларының жеңімпаздары мен жүлдегерлері марапатталды. Биыл байқауға 60-тан астам талапкер қатысқан. Оның ішінде мектеп оқушыларынан бастап, заңгерлер, ұстаздар, тарихшылар мен студенттер де бар.
Бейсенкүл Нарымбетова, форумды ұйымдастырушы:
Бұл жобаны биыл рәміздер күнінде бастадық. Өйткені рәміздер жыл бойына насихатталуы керек. Тағы бір мұның керек нәрсесі әлеуметтік желіде контентті дұрыстауға, сапалы болуына үлесін қосты деп айтар едім.
Бойға мақтаныш сезімін ұялатқан осындай шаралардан соң жастар көк байрақты қолға алып, шеру өткізді. Форумға жиылған көпшілік патриоттық әндерді қосыла шырқады.
Ғани Қалмаханов
