Ғылыми инфрақұрылымға қолдау қажет

Қазақ ғалымдарының әлемдік ғылыми жаңалық ашуға мүмкіндігі бар. Бірақ ғалымдардың 44% қажетті қымбат жабдықтарға қол жеткізе алмай отыр. Бүгін Алматыда алғаш рет өткен Ғылымды коммерцияландырудың Еуразиялық форумы аясында осындай пікірлер айтылды. Жиынның мақсаты – Еуразия елдерінің ғылыми техникалық әлеуетін ілгерілетіп, ғылым мен бизнес арасындағы өзара іс-қимылды нығайту. Мамандар саланың кенжелеуіне басты қиындықтар ретінде ғылым мен бизнес байланысының аздығы, ғылыми зерттеулерге қолдаудың аздығы дейді. Форум аясында қазақстандық ғалымдардың жобалары көрмеге қойылды.

Төлен Жеңісбек, ҚР Президенті жанындағы Ұлттық ғылым академиясы қоғамдық даму ғылымдары орталығының басшысы:

Қазақстанда ғылымды қаржыландыру 2 есе өсті. Соңғы деректерге сүйенсек, соңғы 3 жылда 643 млрд-қа жоспарланып отыр. Ғылым тек ғылыми зерттеулер болып қалып қоймау керек. Ол қоғамға, қоғам игілігіне айналатын жобалар болу керек. Сонда ғылым қоғамға пайдасын тигізеді.

Жазира Оразқызы