Алматыда «Жасыл аула» күзгі науқаны басталды

Алматыда «Таза Қазақстан» акциясы аясында «Жасыл аула» күзгі науқаны басталды. Көпқабатты үйлердің ауласын жасыл желекке толтырамыз деген тұрғындарға шегіршін, сәнағаш, қайың секілді 3 мың көшет тегін беріледі.

Ол үшін электронды поштаға аты-жөніңізді, көшет отырғызатын аумақтың фотосуретін, қажетті желек санын жазып жіберу керек. Кейін жергілікті халық отырғызылған ағаштарды 3 жыл баптауға міндетті. Күзгі ағаш отырғызу маусымы қазан айында басталып қарашаның соңына дейін жалғасады. Айта кетейік, былтыр 10 мың түп ағаш егілсе, биыл көктемде 200 адамға 3 мың желек берілген.

Әсем Бекбосынова, қала тұрғыны:

2 жылдан астам уақыт осы жерде тұрып келе жатырмыз. 9 мыңға жуық ағаш егілді. Біз келгенде негізі ағаш болмаған. Осы акция аясында ағаш егілу жұмыстары жүргізіліп жатыр. Көршілерім өте разы. Белсенді қатысып жатырмыз. Осы биыл жалғасын таба берсе екен деген тілектеміз.

Айдана Қуантхан