Халықаралық рейтингте еліміздің қаржылық көрсеткіші жақсарды

Қазақстан Moody's халықаралық рейтинг агенттігінің шкаласы бойынша ел тарихындағы ең жоғары көрсеткішке ие болды. Әлемдік беделді ұйым еліміздің ұзақ мерзімді қаржылық рейтингін (би-эй-эй) Ваа2-ден Ваа1-ге дейін көтерген.

Бұл еліміздің экономикалық, қаржылық әлеуеті «тұрақты» дегенді білдіреді. Көбіне мұндай рейтингке инвесторлар жүгінеді. Яғни қандай да бір елдің экономикасына қаржы құймас бұрын осы көрсеткіштің көмегімен бағалап алады. Ал сарапшылардың пікірінше, рейтингтің жақсаруына жүргізіліп жатқан реформалар саяси тұрақтылық, азаматтық белсенділік және қабылданып жатқан сыбайлас жемқорлыққа қарсы шаралар оң әсер еткен.