Бразилияда ұшақ апатына байланысты елде үш күн қаралы деп жарияланды. Оқиға кеше Сан-Паулу штатының Виньеду қаласы маңында болған. Лайнер тұрғын үйлерге жақын жерге құлады. Оның бортында болған 62 адамның барлығы қаза тапқан. Әзірге апаттың себебі белгісіз. Ұшақтың екі қара жәшігі табылды. Олар Бразилиа қаласына сараптамаға жіберілген.
Мамандар қара жәшіктердің көмегімен ұшақтың неліктен құлағанын анықтап жатыр. Оқиға орнына өрт сөндірушілер, әскери полиция мен елдің азаматтық қорғаныс департаментінің қызметкерлері барды. Марқұмдардың аты-жөні анықталып жатыр. Ал лайнердің құлаған сәтін көрген адамдар үрейлі сәтті бастан кешкенін айтады.
Жозе Карлос Перейра, куәгер:
Ұшақ дәл үйіміздің үстімен ұшты. Кенет күрт төмендей бастап, жерге құлады. Лапылдаған жалын көрдік. Айнала өртке оранды. Өте қорқынышты, үрейлі көрініс.
Арай Төлеген
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Бразилияда үш күндік аза тұту жарияланды&mh_tags=Qazaqstan&mh_page=https://qazaqstan.tv/news/197688/)