Жаңалықтарды Telegram арнамыздан оқыңыз!Қызылорда қаласында жеке тұрғын үйде газ жарылды. Төрт жасөспірім зардап шегіп, ауыр халде ауруханаға түсті. Қазір осы оқиғаға қатысты қылмыстық іс қозғалды.
Әділбек Серікұлы, тілші:
Жарылыстан кейін үй жарамсыз күйде қалған. Төбесі опырылып, ортасына түскен. Ал өрт сөндірушілер үйіндінің арасынан газ баллонын алып шығып, тағы бір қауіптің алдын алған.
Оқиға қаланың шеткі аумағы Әл-Фараби мөлтек ауданында болды. Үш бөлмелі баспанада соңғы 20 күн адам тұрмаған. Бірақ үй иесінің жақын туысы күнделікті келіп дүние-мүлікті бір тексеріп, бақылап отырғанын айтады. Ал балалардың қашан, қай уақытта қалаға келгенін білмепті.
Өтепберген Ермаханов, үй иесінің туысы:
Азанда сағат 11-дің кезінде келіп көріп кеттім. Ол кезде аман. Балалардың ол жақтан бері қыдырып келгенін білмеймін. Кешкілік осындай оқиға болған кезде бір-ақ білдік. Ішіндегі адамдардың аман қалуы неғайбыл еді. Білмеймін, балалардың періштесі қаққан шығар.
Жарылыстан зардап шеккен жасөспірімдер 14-15 жаста. Барлығы Қармақшы ауданы Ақжар ауылының тұрғындары. Қазір төртеудің екеуі жансақтау бөлімінде жатыр. Дәрігерлер қатты күйік шалған дейді.
Олжас Құрбанбай, балалар травматологы:
2 ұл, 2 қыз газ жарылысынан күйік жарақаттарымен түсті. Көлемдері 50 пайыздан жоғары. Әрқайсынікі 50 пайыз, 60-70 пайыздың шамасында. Жарақаттары терең. Қазір реанимация бөлімшесінде реанимациялық ем шараларын қабылдап жатыр.
Қирандыға айналған үйдің аумағына өрт сөндірушілер өзге адамдардың кіруіне тыйым салған. Қазір оқиғаның мән-жайын анықтау үшін тиісті сараптама тағайындалды. Дегенмен мамандар баспананың ішінде табиғи газ ауаға тараған деген болжам жасап отыр.
Нұрсұлтан Ибрагимов, облыстық ТЖД бастығының міндетін атқарушы:
Газдың жылыстауынан жарылыс орын алып, 4 жасөспірім жарақат алғаны жөнінде. Қазіргі таңда Қылмыстық кодекстің 292-баптың 2-бөлгімен қылмыстық іс қозғалып, тергеу амалдары жүргізіліп жатыр.
Жалпы жыл басынан бері облыс аумағында жеке тұрғын үйлерде 127 мәрте өрт тіркеліп, алты адам жарақат алған. Төртеуі қайтыс болды.
Әділбек Серікұлы
