Жаңалықтарды Telegram арнамыздан оқыңыз!
Қытай төрағасының Қазақстанға сапары әлем ақпарат құралдарының назарына ілігіп отыр. Си Цзиньпиннің Астанаға, одан кейін Тәжікстанға баратыны жөнінде Жапонияның «Эн-эйч-кей» телекомпаниясы хабар таратты. Оның дерегінше, Қытай лидерінің Орталық Азияға сапары сейсенбіден сенбіге дейін жалғасады.
Бұл тақырып түріктің «Йені Шафах» газетінің назарынан да тыс қалған жоқ. Оның материалы «Қытай жетекшісі Си саммитке қатысу үшін Қазақстанға ұшты» деген тақырыппен жарияланды.
Си Цзиньпиннің Астанаға келгенін Үндістанның «Хинди» басылымы да хабарлады. Оның мәліметінше, Шанхай Ынтымақтастығы Ұйымының саммитінде Ауғанстандағы жағдай, Украинадағы әскери қақтығыстар және қауіпсіздікті нығайту мәселелері талқыланады.
Қытайдың «Халық» газеті болса, бұл сапар жайлы мақаласын «Қытай мен Қазақстан арасындағы мыңжылдық достық жалғассын» деген атпен жариялаған. Онда екі елді 1700-шақырымдық ортақ шекара, 2000 жылдық алыс-беріс және ежелгі Жібек жолы байланыстыратыны айтылған.
Ал Ресейдің «Интерфакс» агенттігі президент Қасым-Жомарт Тоқаевтың Астана әуежайында Қытай басшысын өзі қарсы алғанына және сол кездесуде балалардың ән шырқағанына мән берген.
