Жаңалықтарды Telegram арнамыздан оқыңыз!Зиянкестер 440 мың гектардан астам алқапқа жайылған. Мамандар соның 391 мың гектарына химиялық өңдеу жүргізді. Жұмыс әлі жалғасады. Себебі шегіртке әзір егінге түспегенімен, қауіп сейілмей тұр. Әсіресе оңтүстік аудандарда жағдай күрделі.
Дәуренбек Әбдібек, тілші:
Бір қарағанда жолдың мына тұсында ұсақ қиыршық тастар шашылып жатқан тәрізді. Өкінішке қарай бұл жәй тас емес, өсімдік атаулының жауы – қара шегіртке. Жолындағының бәрін жайпап өтеді. Міне, жиектегі шөпті тұқылына дейін кеміріп тастаған.
Наурызым ауданында жеті зерттеу тобы жұмыс істеп жатыр. Олар жаяулап дала кезіп, шегірткенің дернәсілі шоғырланған жерлерді анықтайды. Инспектор-зерттеуші Нұрбол Ермағанбетовтің тобы соңғы он бес күннің ішінде 50 мың гектар жерді шолып шыққан.
Нұрбол Ермағамбетов, зерттеуші инспектор:
Бір екі-үш бригаданы бір 30 мың, 40 мың, 50 мың гектарды бір адам бір машинамен, улайтын машинамен қарайды. Сосын тағы 30,40 шақырымнан кейін екінші машина, бригадалар сол жақта.
Зерттеушілер зиянкестер шамадан тыс шоғырланған жерді анықтаған соң, сол тұсқа дәрілеушілер келіп іске кіріседі. Улау жұмысы жауынды, ыстық, желді күндері жүргізілмейді. Себебі ауа райының мұндай кездерінде препатарттың еш әсері болмайды. Биыл шегіртке жұмыртқасы топырақтың терең қыртысында қалуы да жұмысты қиындатып тұр.
Сәулеш Алдажұманова, Наурызым аудандық аумақтық инспекциясының басшысы:
Су тасқыны болғанда жатқан жерлерінің үстімен тағы жермен жабылып қалған ғой. Содан 3-5 сантиметрге салса, бұлардың жұмыртқалары астына кетіп қалған ғой, 7-8 сантиметрге дейін, содан жер жылынған сайын ақырындап-ақырындап шығып жатқандығы, сол кішкене қиындау. Өйткені бірнеше рет шыға береді бір орында.
Зиянкестерге қарсы күрес қазір тоқтаусыз жүріп жатыр. Тек Арқалық қаласына қарасты ауылдардың аумағында 20 мың гектардан астам жер өңделген. «Соның арқасында алқаптарымыз аман», - дейді шаруалар.
Шәймерден Ыбыраев, шаруа:
Шегіртке шығып жатыр. Әр жерден ошақтары табылып. Облытсан келіп жұмыс істеп жатыр мамандар. Бір жүріп өтті кеше. Нәтижесі бар. Өліп жатыр.
Биыл облыста 5 млн гектардан астам алқапқа дән сіңірілген. Қазіргі мақсат – шегірткенің егістікке залал келтіруіне жол бермеу.
Дәуренбек Әбдібек
