Алматылық келіншек перзентханадан шыққанын растайтын құжатты алу үшін Damumed қосымшасын жүктеп, ондағы мәліметті оқып таң қалған. Өйткені, қосымшада өзінің есірткіге тәуелділер тізімінде тұрғанын байқаған.
Мадина Жарболованың айтуынша, Damumed-те оның 2019 жылы әлеуметтік қызметкерге жүгінгені көрсетілген. Тіпті, қабылдау қағазында науқастың нашақор екені жазылған, онымен психокоррекциялық әңгіме де жүргізілді делінген. Бірақ келіншек мұның өтірік екенін айтып отыр. Сондай-ақ, ол үйіне емхана қызметкері келгенін де жасырмай айтып, бір түннің ішінде қосымшадағы деректерді түзетуге тырысқан деп шағымданды.
Ал жауапты №17 қалалық емхана осы жайтқа қатысты тиісті тексеру жүргізілетінін хабарлады. Сондай-ақ, қалалық денсаулық сақтау басқармасы «Damumed» қосымшасы енді іске қосылып жатқан кезде кеткен техникалық қателік болуы мүмкін деп отыр. Енді емхана мен тұрғын «Damumed»-ке жалған мәліметті жою туралы арыз түсірмекші. Егер қосымшадан өшірілмесе, іс сотқа кетеді.
Әйгерім Ердәулет
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Damumed-тегі қателік: Тұрғынды «есірткіге тәуелді» деп көрсеткен&mh_tags=Qazaqstan&mh_page=https://qazaqstan.tv/news/195156/)