2025 жылға дейін ауыл мен қала тұрғындары 100 пайыз ауыз сумен қамтылуы керек - Олжас Бектенов

2025 жылға дейін ауыл мен қала тұрғындары 100 пайыз ауыз сумен қамтылуы керек. Бүгін Премьер-министр Олжас Бектенов осындай тапсырма берді. Үкіметте қалалар мен ауылдық елді мекендерді сумен жабдықтау мәселесі қаралды.

Су ресурстары және ирригация министрінің бірінші орынбасары Болат Бекнияздың айтуынша, қазір 9 облыста 29 жоба іске асып жатыр. Оған сай 2 мың шақырым су құбыры салынбақ. Бұл 500-ге жуық елді мекен тұрғындарын тіршілік көзімен қамтуға мүмкіндік береді. Үкімет басшысы бұл жұмыстарға асқан жауапкершілікпен қарауды тапсырды.

Олжас Бектенов, ҚР Премьер-Министрі:

Өңір әкімдіктері жыл соңына дейін барлық объектілерді уақтылы тапсырып қана қоймай, келесі жылдың жобалары бойынша бекітілген жоспарлардың, құжаттаманың болуы мен қаржыландыруды қамтамасыз етуі керек. Биылғы жылғы 1-ші шілдеге дейін өңір әкімдіктері 77 ауыл мен 28 қалада сумен жабдықтау жобалары бойынша жобалық-сметалық құжаттаманы әзірлеуді аяқтауға тиіс.