Солтүстік Қазақстанда 4 адамның өліміне қатысты сот үкімі шықты

Солтүстік Қазақстан облысында шошқа фермасында тіркелген 4 адамның өліміне қатысты сот үкімі шықты. Қайғылы оқиға былтыр Тайынша ауданының Новоивановка ауылында болған. «ЕМС Agro» серіктестігінің жұмысшылары кәріз сорғысын жөндеу үшін бірінен соң бірі құдыққа түскен. Содан сыртқа шыға алмаған. Сараптама қорытындысы бойынша олардың метан және күкірт сутегіден уланғаны белгілі болды. Осы оқиғаға қатысты 2 күдікті жауапқа тартылды. Олардың бірі сорғы станциясының бастығы, екіншісі қауіпсіздік қызметінің жетекшісі. Дәлел жеткіліксіз болғандықтан сот екеуін де ақтады.

Эльмира Кәленова