Осы аптаның соңына дейін тасқын шығынын есептеп бітіру қажет - Олжас Бектенов

Бүгінгі отырыс тасқыннан зардап шеккен өңірлерді қалпына келтіру жұмыстары бойынша есеп беруден басталды. Үкімет басшысының орынбасары Қанат Бозымбаевтің мәліметінше, еліміз бойынша 12 мыңнан астам баспананы су басқан. 5 мыңнан астам саяжай үйі зардап шеккен. Ал арнайы комиссия бүлінген баспаналардың 84 пайызын ғана техникалық тексеруден өткізіп үлгеріпті. Нәтижесінде олар 4 мыңнан астам үйді апатты, 9 мыңнан астам үйді жөндеу керектігі туралы қорытынды шығарған. Дегенмен, вице-премьер де, Үкімет басшысы да су басқан өңірлерде шығынды есептеу жұмыстары әлі баяу жүріп жатқанын айтады. Әсіресе, Батыс Қазақстан және Ақтөбе облыстарының есебі көңіл көншітпейді.

Сондықтан әкімдіктерге Өнеркәсіп министрлігімен бірге тұрғындардың баспаналары мен мүліктеріне келтірілген залалды бағалау жұмыстарын осы аптаның соңына дейін аяқтауды тапсырамын. Азаматтарымыздың қиын жағдайына түсіністікпен және жан-жақты мұқият қараңыздар. Жұмыстарды кешіктірмей барынша тездету керек.

Ал Үкімет басшысының орынбасары Қанат Бозымбаев бұл жұмысты қатаң бақылауда ұстауға жауапты. Жалпы Үкімет жаңа оқу жылына дейін тасқыннан зардап шеккен тұрғындар баспаналы болуы қажет деп отыр. Ал бүгінде 2 мыңға жуық үйдің құрылысы басталып, 3 500-ге жуық баспананы сатып алу жоспарланған.