Петропавлдағы Заречный кенті жабылды

Петропавлдағы Заречный кентінің тұрғындары толықтай эвакуацияланып, елдімекен жабылды. Ұлттық арнаның Солтүстік Қазақстандағы тілшісі Эльмира Кәленова судиямен тікелей байланысқа шығып тұр.

Эльмира Кәленова, тілші:

Бүгін тасқын Петропавлға жетті. Есіл өзені 50 сантиметрге көтерілді. Ең алдымен Заречный кентін су басады. Сондықтан осы ауданның тұрғындары бірінші кезекте қауіпсіз жерге көшірілді. Барлығы мыңға жуық адам. Әкімдік өкілдерінің айтуынша тұрғындардың басым бөлігі туыстарының үйіне баруды жөн санаған. Кейбіреуі қала мектептерінің біріндегі эвакуациялық пунктке орналастырылды. Қазір Заречныйға жол жабық. Кіреберісте полиция қызметкерлері кезекшілік атқаруда.

Петропавлға көршілес Қызылжар аудананда да су тасқыны болып жатыр. Боголюбово, Надежка және Семипалатное ауылдарында бірнеше үйге су кірді. Ресми мәліметке сәйкес облыста 100-ден астам үйді су басты. Өңірге Қарағанды, Ұлытау, Павлодар, Түркістан, Алматы облыстарынан құтқарушылар мен әскерилер келді. Тасқынға қарсы шараларға еріктілер де қосылды. Барлығы 3 мыңнан астам адам еңбек етіп жатыр.

Эльмира Кәленова