Атбасар қаласында 100-ден астам үйге су кірді

Ақмола облысының Атбасар қаласында 100-ден астам үй мен мектепке қарғын су кірді. Тағы 200-ге жуық баспана мен екі білім ордасы қауіпті аймақта тұр. Кешелі бері 200-ден астам адам қауіпсіз жерге көшірілді. Қазір қалада 7 уақытша орналыстыру пункті ұйымдастырылған. Алайда, эвакуацияланған тұрғындардың барлығы дерлік туыстарының үйлеріне кеткен. Құтқару жұмыстары әлі де жалғасуда. Қауіп сейілген жоқ. Аудандық төтенше жағдайлар бөлімінің мәліметінше, Жабай өзенінің деңгейі 6 метрден түспеді. Сондай-ақ, бүгін Бұланды ауданында Жолдыбол өзені арнасынан асып, Иванковка ауылындағы 45 үйге қарғын су кірді. Бұған егістіктегі қардың тез ерігені себеп. Жолды су шайып, қатынас тоқтағандықтан елдімекеннен 52 адам тікұшақпен эвакуацияланды.