Атырауға Ұлттық ұлан бортымен 23 тонна гуманитарлық көмек жеткізілді

Атырау облысына Ұлттық ұланның бортымен бүгін 23 тонна гуманитарлық көмек жеткізілді. Астанадағы  «Biz Birgemiz Qazaqstan» қоғамдық қоры өңірдегі тасқыннан зардап шеккен ағайынға азық-түлік пен керек-жарақ және сорғы техникасының жүз данасын жөнелткен. Сонымен қатар елордадағы бірнеше кәсіпкер бірлесіп, 10 тонна азық-түлік алып берген. Нәубеттен жапа шеккен жұртшылыққа қолдау болсын деп бірнеше аспаздық топты да ұйымдастырған. Олар эвакуациялық орталықтарға орналастырылған адамдармен қоса, табиғи апатпен арпалысып жатқан мамандарды ыстық тамақпен қамтамасыз етеді.