Ақтөбе облысында су тасқынынан зардап шеккен кәсіпкерлердің шығыны есептеліп жатыр

Ақтөбеде су тасқынынан кәсіпкерлерге келген шығын көлемі есептеліп жатыр. Облыс орталығы мен аудандарда штабтар құрылды. Сондай-ақ, комиссиялар жұмысын бастады. Әзірге су астында қалған кейбір қыстақтарға әзір бару мүмкін емес. Сондықтан, шығындарды есептеу жұмыстарының уақыты созылуы мүмкін. Қираған ғимараттар мен жарамсыз болып қалған техникалар да бар.

Қазірге дейін облыстық Атамекен кәсіпкерлік палатасына 72 арыз келіп түскен. Оның 64-і аудандардан. Бұған дейін өңірде тасқыннан зардап шеккен «Ауыл аманаты» бағдарламасының қатысушыларына несиелерін төлеу мерзімі үш айға кейінге шегерілетіні хабарланған еді.

Рахат Тәжібаев, Облыстық «Атамекен» кәсіпкерлер палатасының бөлім басшысы:

«Басты мақсат -келтірілген зардап бойынша, бағалау бойынша обьектілерге шығу бойынша жұмыстар жүргізіліп жатыр. Яғни, «Күшіміз – бірлікте» атты кәсіпкерлердің қоры ашылды. Сол бойынша нақты кәсіпкерлерге келтірілген шығын бойынша жұмыстар жүргізіледі». 

Жақсыбек Кемал