Атырау облысында су тасқынының қаупі әлі сейілмей тұр

Атырау облысында су тасқынының қаупі әлі сейілмей тұр. Су деңгейі сағат сайын көтеріліп, Ойыл өзенінің бойында орналасқан ауылдық округтерге қауіп төнген. Қазір Қызылқоға ауданындағы ахуалды бізге әріптесім Нұрсұлтан Нұрсейіт баяндайды. 

Нұрсұлтан Нұрсейіт, тілші:

Біз қазір Қоныстану ауылындамыз. Мұнда су тасқыны бойынша ахуал әлі күрделі. Газ қондырғысын су шайып кетіп, 276 тұрғын-үй көгілдір отынсыз қалды. Өзен жағалауынан асқан су Қоныстану, Тайсойған, Қарабау ауылдарына жеткен. Тасқын су ауыл іргесіндегі 4 үйге кірген. Сол оқиғаны өз көзімен көрген тұрғынмен сұхбаттасқан болатынбыз. Тыңдап көрейік.

Нұрлан Өтепқалиев, ауыл тұрғыны:

Көз алдымызда кетіп қалды, балдар шапқылап жүрді. Өтеген деген кісі тракторымен 2 сағаттай жүрді. Бір уақытта болдық деп айқайлап жатыр. Уже кетіп қалды.

Нұрсұлтан Нұрсейіт, тілші:

Кеше облыс орталығынан бөгетті нығайту жұмыстары үшін 50 құтқарушы, 20 ерікті, 1,5 мың қап пен қажетті құрал-жабдық жеткізілді. Тайсойған және Қарабау ауылдарына да 60 құтқарушы барды. Бұл жұмыстар тәулік бойы жүргізіледі.