Шымкентте аудан әкімінің орынбасары 11 жылға сотталды

Шымкент қаласында аудан әкімінің бұрынғы орынбасары пара алғаны үшін 11 жылға сотталды. Ол лауазымды қызметін пайдаланып, абаттандыру жұмыстарын атқарған мердігер мекемеге қамқорлық танытқаны үшін 60 миллион теңге сыйақы алған. Сондай-ақ қабірстанды күтіп ұстауға бөлінген 28 миллион теңге қазына қаржысын жымқырған. Аудан әкімінің орынбасары бұл істі үш адам болып жүзеге асырған. Оның ішінде Еңбекші ауданы әкімдігінің бас маманы мен мердігер мекеменің өкілі бар. Қылмыстық істер бойынша ауданаралық мамандандырылған соты экс орынбасардың сыбайластырының бірін 10 жылға, екіншісін 3 жылға бас бостандығынан айырды. Сотталғандардың барлығы енді мемлекеттік қызметте жұмыс істей алмайды.