Қарағанды облысының Шет ауданында төтенше жағдай жарияланды

Қарағанды облысында қарғын судан зардап шеккен Шет ауданында төтенше жағдай жарияланды. Мұнда үш елдімекендегі 34 үйге су кірген. Қазір тұрғындар қауіпсіз жерге көшірілді. Келтірілген шығынды есептейтін арнайы комиссия құрылды. Су тасқыны салдарынан 250-ге жуық тұрғыны жолаушылар пойызымен эвакуацияланды. Тұрғындарды тасымалдауды қамтамасыз ету үшін Қарағанды - Балқаш - 2 бағытындағы жолаушылар пойызы жұмылдырылды.

Қардың қарқынды еруіне байланысты республикалық маңызы бар Екатеринбург - Алматы тасжолы жабылған болатын. Жолда қалған ауыр жүк көліктерінің жүргізушілеріне еріктілер мен жергілікті әкімдік ыстық тамақ таратып көмек көрсетті. Қазір күре жол қалыпқа келтірілді.

Жандос Бақытұлы