Ақмола облысында 300-ден астам адам қауіпсіз жерге көшірілді

Ақмола облысында екі күнде 300 ден астам адам қауіпсіз жерге көшірілді. Апатты аймақтарда құтқару жұмыстары әлі де жалғасуда.

Ұмсындық Наурызбаева, тілші:

Мен қазір қаладағы бейімдеу орталығында тұрмын. Мұнда кешеден бері су тасқынынан зардап шеккен 51 адам көшірілді. Оның 12-сі бала. Қазіргі таңда мамандар оларға психологиялық көмек көрсетуде. Орталықта да барлық жағдай жасалған. Ғимараттың іші жылы. Тұрғындар үш мезгіл ыстық тамақпен қамтамасыз етілген. Еріктілер мен студенттер де азық-түлік әкеліп, қол ұшын созып жатыр.

Әлия Әшімова, қалалық әлеуметтік бейімдеу орталығының директоры:

Тұрғындардың жағдайы жақсы. Төсек-орын жеткілікті. Кешеден бері орталыққа 51 адам келіп түсті. Азық-түлікпен, гигиеналық заттармен қамтамасыз етіп отырмыз. Орталық мамандары түсініктеме жұмыстарын жүргізіп отыр.  

Ұмсындық Наурызбаева, тілші:

Құтқару жұмыстары әлі де жалғасуда.Төтенше жағдайлар департаментінің мәліметінше, кеше 250-ге жуық адам қауіпсіз жерге көшірілсе, бүгін 113 тұрғын эвакуцияланған. Құтқарушылар күндіз-түні жұмыс істеп жатса да, қауіп әлі де бар. Өзен деңгейі бүгін тағы көтеріліп, қаладағы 16 баспана , 41 үйдің ауласы мен балабақшаға су кірген.

Ұмсындық Наурызбаева