Өзбекстанда газ бен электр қуатын ұрлау дерегі азаймай тұр

Ташкентте жылыжай иелері нысанды жылыту үшін табиғи газды заңсыз пайдаланған. Салдарынан газ таратушы мекемеге 1 миллиард сумға жуық шығын келді. Жалпы, елде газ бен электр қуатын ұрлау дерегі азаймай тұр. Былтыр 2 156 дерек тіркелген.

Бұл туралы «УзЭнергоИнспекция» мекемесінің өкілдері хабарлады. Әсіресе, криптовалюта өндіретіндердің заңсыз әрекеті тиылар емес. Соңғы екі айда бұған қатысты 42 жағдай тіркелген. 8 млн киловатт-сағат энергия ұрланған. Салдарынан электр қуатымен жабдықтаушы компаниялар 26 миллиард сумнан астам шығынға батқан.

Ал былтыр тұтынушылардың энергиялық ресурстарды пайдалану ережесін бұзу фактілері бойынша 1 484 әкімшілік іс қозғалған. Мемлекетке келген шығын 215 миллиард сумнан асады.

Навруз Норбобоев, «Узэнергоинспекция» компаниясы ақпарат қызметінің басшысы:

Құқық қорғау органдарымен, электр және газбен жабдықтау кәсіпорындары мамандарымен бірлесіп жүргізілген тексеру барысында тұтынушылардың жымысқы әрекеті әшкере болды. Былтыр 88 миллион текше метр табиғи газ мен 77 миллион киловатт-сағат электр энергиясы заңсыз пайдаланылған.

Базаркүл Отыншиева